డాలర్‌పై రూపాయి పట్టు.. ఆర్బీఐ కీలక నిర్ణయంతో బలోపేతం

అంతర్జాతీయ మార్కెట్లలో డాలర్‌తో పోలిస్తే భారత రూపాయి మారకం విలువ ఇవాళ్టి ట్రేడింగ్‌లో బలపడింది. ప్రభుత్వ రంగ చమురు శుద్ధి సంస్థలకు రిజర్వ్ బ్యాంక్ ఆఫ్ ఇండియా (ఆర్బీఐ) ఇచ్చిన ఓ కీలక ఆదేశం ఇందుకు ప్రధాన కారణంగా నిలిచింది. డాలర్లను నేరుగా కొనుగోలు చేయడానికి బదులుగా ప్రత్యేక క్రెడిట్ లైన్‌ను ఉపయోగించుకోవాలని ఆర్బీఐ సూచించడంతో డాలర్లకు డిమాండ్ తగ్గి రూపాయిపై ఒత్తిడి తగ్గింది.

గత సెషన్‌లో 93.20 వద్ద ముగిసిన రూపాయి, ఈరోజు ఉదయం ట్రేడింగ్‌లో 25 పైసలు లాభపడి 92.95 వద్ద కొనసాగుతోంది. దేశీయ ఈక్విటీ మార్కెట్లలో సానుకూల సెంటిమెంట్, ఇజ్రాయెల్-లెబనాన్ మధ్య కాల్పుల విరమణ వార్తలు, అమెరికా-ఇరాన్ చర్చలలో పురోగతి అంచనాలు కూడా రూపాయికి మద్దతునిచ్చాయి. అయితే, ప్రపంచ మార్కెట్లలో డాలర్ బలంగా ఉండటం రూపాయి లాభాలను కొంతమేర పరిమితం చేస్తోంది.

మరోవైపు అంతర్జాతీయంగా ముడి చమురు ధరలు తగ్గాయి. బ్రెంట్ క్రూడ్ బ్యారెల్‌కు 1% పైగా తగ్గి 97.99 డాలర్ల వద్ద, యూఎస్ డబ్ల్యూటీఐ క్రూడ్ దాదాపు 2% తగ్గి 92.91 డాలర్ల వద్ద ట్రేడవుతున్నాయి. ఇక బంగారం, వెండి ధరలు ఇవాళ‌ ఒడుదొడుకులకు లోనయ్యాయి. జూన్ 5 గోల్డ్ ఫ్యూచర్స్ స్వల్పంగా రూ.98 పెరిగి రూ.1,53,250 వద్ద ట్రేడవ్వగా, మే 5 సిల్వర్ ఫ్యూచర్స్ 0.83% లాభపడి రూ.2,50,716 గరిష్ఠాన్ని తాకింది.